大公網1月2日訊（記者 龔學鳴）反對派最近成立「守護公義基金」，為四個被政府提出司法覆核嘅反對派議員籌款打官司，仲聲稱響民陣元旦遊行籌到一百幾萬。撲水成功，反對派陣營當然高興，不過有市民就相當扯火喇。有網民今日響社交網站Facebook上載咗一條短片，影到「佔中三子」戴耀廷、陳健民、朱耀明響遊行期間俾市民喪鬧。嗰位網民話「佔中三子」不知羞恥呼籲路人捐款，「做漢奸面皮真夠厚！人不要臉真的天下無敵！」。
事緣「佔中三子」元旦日響灣仔同一啲義工擺街站，呼籲市民捐款支持「守護公義基金」。由網民上載嘅一分半鐘短片見到，一批市民不斷指罵「佔中三子」，除咗大鬧三人係「漢奸」、「乞衣」，仲粗口橫飛添，認真火滾。幾名警察隨即到場調停，分隔雙方，呼籲市民冷靜。不過，「佔中三子」對市民嘅批評似乎不以為然。其中，朱耀明就用揚聲器話「祝各位新年快樂、身體健康」。有睇咗短片嘅網民紛紛留言讚好，有人仲怒斥「佔中三子」「厚顏無恥」、係「過街老鼠」添。
