民建聯副主席張國鈞（Horace）當選立法會議員後，日日坐喺議事廳開會聽反對派「拉布」，但身材竟然仲Fit過以前？秘訣原來係除咗玩劍道之外，仲定時定候去做Gym（健身）。尋日Horace仲喺中環一間健身訓練中心，巧遇另一位正在操fit嘅老友，民建聯副秘書長葉傲冬，雙雄相遇仲孖住教練影相擺上網，等眾網民「葡萄」下佢哋嘅成果。
話說一擺上網，果然好多星級「葡萄友」上釣，民建聯另一名立會新丁劉國勳（Edward）就話「見到你哋嘅效果，我都想試下」，連新社聯副總幹事、沙田區議員李世榮都話想玩埋一份。民建聯蔣麗芸仲好抵死咁喺底下留言，叫樓上兩位心動不如行動，一於組團去做Gym，修身之餘仲可以鍛煉下體魄應付繁重嘅議員事務。
其實鄭晴知道，Edward不嬲都好健康，連汽水都只會飲無糖嘅梳打水，如果跟埋Horace去做Gym，話唔定隨時變成「立法會男神」？
