圖：香港迪士尼總餅師陸繼光稱，不時透過揣摩角色，來掌握角色個性 大公報記者謝進亨攝
「鐵甲奇俠」近日再度熱爆！香港迪士尼嚟緊1月11日，有新機動遊戲「鐵甲奇俠飛行之旅」開幕外，樂園仲推出鐵甲奇俠造型嘅甜品。每款甜品咁傳神，原來係師傅睇曬咁多集電影，仲當自己係演員咁揣摩角色嘅神髓，先至能夠製作而成。有機會品嘗嘅話，「相機先食」是常識吧！
鄭晴聽香港迪士尼總餅師陸繼光透露，每次迪士尼推出新主題時，大約畀兩個月時間佢去構思新甜品。以今期主打嘅鐵甲奇俠為例，甜品造型參考角色心口嘅能源器、頭盔同雙手，明眼人一望就知！至於餡料就選用朱古力脆脆，個口感就好似鐵甲奇俠，充滿「爆炸性」。師傅仲話，整餅要顧及埋食客進食，情願每件整細少少，方便入口之餘，仲可以試多幾款。
甜品整到藝術品咁，鄭晴當然食唔停口啦，真係要套用電影「美國隊長」嘅經典對白，同鐵甲奇俠講聲：「I can eat it all day（我可以食足成日呀）！」
