聖誕長假期話咁快就過咗，意味一眾打工仔要離開被窩起身返工。雖說立法會嘅假期未完無會開，但民建聯立法會議員劉國勳（Edward）尋日仍然晨早返立法會處理公務，點知一返到去就發現辦公室個雪櫃「被爆格」，究竟係咩玩法？
原來係Edward辦公室嘅小雪櫃太低溫，導致雪櫃兩罐梳打水「爆炸」，連鋁罐個蓋都摧毀埋。
Edward喺Facebook帖文時仲化身「劉Sir」教物理，解釋爆罐原因，話水結冰時體積膨脹，而且汽水中溶解的二氧化碳會釋出，導致汽水冷凍後體積增加，罐內產生更大壓力，使罐變形甚至被撐爆。
Edward同鄭晴講，雪櫃入面仲有五、六罐梳打水，因為擺咗喺雪櫃門嗰排無咁凍，所以安然無恙，仲話好彩同事已經喺假期前清曬雪櫃食物，加上梳打水無糖，唔會「甜啫啫」，不然會更難清理。原來係虛驚一場，雖然今次「爆格」令啲梳打水「壯烈犧牲」，不過人無事就好啦！
