圖：郭偉強（右二）與社區幹事及義工使用港鐵南港島線服務，圖為黃竹坑站
南港島線正式通車，作為當區區議員梗係要見證呢個歷史時刻，就連佗B有八個月嘅新民黨陳家珮（Judy）都唔怕辛苦，天氣咁凍晨咁早起身，陪眾多南區居民同鐵路迷一齊搭足兩轉頭班車，由海怡半島坐到金鐘再搭返轉頭，鄭晴睇見都替佢辛苦，不過Judy全程就好開心，佢話除咗可以「優先坐嚇優先座」，最重要「阿囝都有份見證通車㗎！」囝囝「未出世，先興奮」，真係夠曬紀念價值！
另外，本身係南區居民嘅工聯會香港島立法會議員郭偉強都有朝早率先試搭，大讚港鐵十分快捷方便，海怡半島11分鐘就出到金鐘，但佢就好關注票價偏貴，南區去中西區和銅鑼灣要$6.7，比收四個幾嘅巴士貴一截，希望港鐵未來可以推出更多優惠，惠及區內基層市民。
