圖：建制派議員同CY同枱食飯交流/網上圖片

　　行政長官梁振英（CY）近排頻頻喺禮賓府同一眾老友聚會，尋日下晝就喺禮賓府設自助餐，同梁太一齊宴請約60位好友。不止有經民聯、民建聯及工聯會等嘅建制政黨，好多前議員好似吳亮星、謝偉銓，以及科大經濟學系教授雷鼎鳴、嶺大公共政策研究中心主任何濼生、香港專業聯盟主席劉炳章同九龍社團聯會理事長王惠貞等等，都係座上客。禮賓府咁星光熠熠，到底做咩呢？

　　鄭晴就問過有出席嘅幾位「星星」，其實大家都係想聚下舊，同埋聽CY預告下佢最後一份《施政報告》嘅大方向。工聯會王國興（興哥）就話，CY尋日話，會盡力做好明年《施政報告》同《財政預算案》，希望能夠好好去運用政府嘅財政盈餘幫助市民咁話，可見即使佢宣布唔連任，都會繼續全心服務市民。

　　興哥讚梁太好堅強

　　唔止咁，興哥全程仲捉緊機會頻頻同CY、梁太Selfie（自拍），擺上Facebook開心share，不亦樂乎。佢話，自己喺席間上感謝CY呢四年為香港做咗好多嘢，又大讚梁太好堅強，為頭家承受好多壓力，希望CY餘下任期能盡力去服務市民。

　　鄭晴亦都留意到，民建聯立法會議員柯創盛（柯仔）送嘢畀CY喎。柯仔話，其實佢只係做「舉手之勞」，幫支持CY嘅市民代送啫，佢又話今次聚會純粹「閒話家常」，氣氛輕鬆，CY亦無提到不連任呢件事。有份出席的何君堯都話聚會好好氣氛，佢又向CY講到「一帶一路」政策的意見，據知席間亦有人鼓勵，即使CY不連任，有關房屋、扶貧及勞工等政策亦要堅持下去。睇來CY未卸任，就已經好多人唔捨得佢囉。

　　鄭晴