今日立法會秘書處正式刊憲，宣布游蕙禎同梁頌恆原先嘅議席出缺，立法會仲要追討佢哋兩個每人約93萬嘅薪津。呢兩位當事人無得做議員啦，咁有咩可以做呢? 咪係繼續擺街站囉！游蕙禎今日就去咗旺角東站外面擺街站，話政府要伸出魔爪，褫奪四位代議士資格。又話自己要直接同市民接觸，講解呢兩個月發生咩事，要捍衛三權分立喎！
游小姐到而家仲係執迷不悟，依然都係咁多歪理。佢哋四個同你哋青政兩人係一樣，都係唔莊重、唔真誠宣誓，佢哋違法，政府依法辦事，有咩做錯呢? 如果見到有錯都唔依法處理，反而縱容佢哋，香港仲係法治社會咩? 仲有，「捍衛三權分立」呢六個字出自游小姐把口真係好諷刺。佢都唔尊重法律，一啲都唔尊重法治，仲話捍衛三權分立?
講到同市民接觸，好多網民直接係游小姐facebook表達不滿，網民黃子軒話：「好心妳先檢討一下自己同好好修養一下自己，搞到今日田地都係自己攞黎(嚟)」另一網民就話Winnie Yeung就話：「顧惦自己啦！咁得閒擺街站，諗下點樣嘔番哂D錢出嚟同找數先啦！」
