圖：新一屆立法會議員尋日喺立法會大樓內影大合照 大公報記者黃洋港攝
新一屆立法會議員尋日喺立法會大樓內影大合照，總共有61位議員出席，被DQ（取消資格）嘅青年新政梁頌恆同游蕙禎梗係冇份影，另外有七名議員未有參與，包括劉小麗、朱凱迪、鄭松泰、郭偉強、陸頌雄、何啟明，同埋梁志祥。至於香港眾志嘅羅冠聰就遲到，搞到畀成班議員噓爆，佢就認真尷尬囉！
尷尷尬尬攝入鏡
尋日晏晝四點半，一眾議員陸續抵達立法會地下大堂集合，聽從秘書處同事嘅指示，排好曬位準備影大合照。正當大會攝影同在場媒體已經影夠，諗住收工之際，羅冠聰急急腳趕到。成班議員見佢姍姍來遲，一致以笑聲同噓聲「歡迎」呢位議會「新丁」。有議員就講笑話，又要再麻煩大會攝影影過張靚相。之後，羅冠聰就尷尷尬尬咁攝喺民主黨鄺俊宇隔籬影相。
其實羅冠聰之前已經試過出席電台節目時遲到，搞到畀節目主持「溫馨提示」，提下佢做議員守時好緊要。影相遲到事小，但畀人感覺就好似唔多尊重其他議員囉，希望羅議員以後能夠有番多啲時間觀念啦。
