四年一度嘅立法會選舉，走激進路線嘅熱血公民「教主」黃毓民（癲狗）喺九龍西落敗，而鄭松泰（泰博）就喺新界西當選，仲做埋「熱狗新共主」添。上任兩個幾月嘅泰博，尋日喺元朗舉行議員辦事處開幕禮，除咗搵嚟百幾個「熱狗」撐場之外，仲搵嚟主張「港獨」嘅「香港民族黨」召集人陳浩天同發言人周浩輝做開幕嘉賓，好似同人好friend噃，咁曬馬法，鄭晴梗係要去睇下喇。
鄭晴聽到，癲狗致辭嗰陣就好得戚咁話，自己當初叫泰博宣誓嗰陣唔好玩嘢，所以依家就成為DQ（取消資格）嘅低危人士，仲不點名咁取笑青年新政梁頌恆同游蕙禎「不聽老人言，吃虧在眼前」，搞到而家淨係做咗兩個月「英雄」。癲狗之後又話，希望泰博唔好好似立法會入面「頭髮好長嗰個」議員，永遠唔做地區工作，淨係識喺議會表演，唔使估都知佢寸緊「長毛」梁國雄喇。
