大公網11月15日訊（記者龔學鳴）青年新政嘅梁頌恆同游蕙禎噚日被判議席懸空，兩位「議員」睇嚟短期內都唔會喺主席拒絕下離奇出現喺立法會議事廳喇。不過睇返近日選舉事務處陸續公開嘅參選人選舉開支同捐贈資料就仲離奇，事關游蕙禎用咗三十三萬嘅選舉經費，當中只有近八萬幾蚊係來自捐贈，即係佢自己扲荷包出咗廿五萬競選。年紀輕輕嘅游蕙禎畢業之後都只係做咗一陣行政人員，工都唔返得耐，自己點儲到廿五萬咁多就真係不得而知喇。講返捐款，游蕙禎申報嘅八萬捐款入面最大一筆捐贈係來自青年新政嘅物品資助，價值大約二萬五千蚊，而其次就係來自一名譯音姓黎嘅人捐出嘅兩萬蚊。

　　記者睇嚇選舉開支用咗去邊，發覺游蕙禎淨係用咗一千蚊喺宣傳顧問費用，用嚟喺社交網站出文做宣傳。問過做社交媒體宣傳行業嘅行家，如果一千蚊淨係用嚟做社交網站出文都唔算話好出奇嘅，但如果有任何其他宣傳配合，都無咩可能做到呢個價錢喇。

　　另外，游蕙禎又申報咗多筆擺設街站前後嘅膳食費，都值成萬幾銀架。咁膳食包括啲咩呢？睇返單，佢地用咗嚟買啤酒、清酒、薯片、棉花糖呢啲零食囉。記者認為，▉年青／年輕▉人都係唔好食咁多垃圾食物喇，一來對健康唔好，二來又貴又唔飽肚，好似佢地咁，食食嚇就食左成萬銀喇。