尋日嘅「反港獨 撐釋法」集會人頭湧湧，鄭晴仲竟然喺人潮中撞到近年經常出席各大抗爭活動嘅息影藝人黃夏蕙（夏蕙姨）（右圖），唔通黃夏蕙變藍夏蕙？
夏蕙姨尋日着住一襲藍色裙出動，引起在場人士紛紛同佢合照。佢話，今次同班Friend身體力行出來反「港獨」撐釋法，係睇唔過眼青年新政兩個「港獨」友喺宣誓嘅時候竟然侮辱我哋中國人。佢仲好嬲咁捉住鄭晴講，「好似你結婚咁之嘛，如果你未來老公喺婚禮上面話『我唔知愛唔愛你』，可能唔愛！咁樣嘅人點樣嫁得落？」夏蕙姨仲話，宣誓係真心做一樣野，絕對唔可以玩玩下！
