「反港獨 撐釋法」集會人士迫爆金鐘立法會大樓一帶。主辦方除咗喺立法會外設有多部大電視，直播講台情況，擔任大會主持嘅工聯會區議員鄧家彪、青賢智匯主席謝曉虹同中小企律師行協會創會會長陳曼琪，仲坐上升降台做講解。鄭晴抬頭一望，升降台將佢哋升上有一、兩層樓嘅高度，真係有少少畏高都做唔到主持呀！
民記小花鼓勵發放正能量
尋日喺會場做主持工作嘅，仲有民建聯新晉小花賴嘉汶（Apple），佢就係民記社交平台嘅主持。鄭晴見到Apple訪問咗唔少民記嘅元老同青年代表，直播至少有一萬一千人睇過，唔少網民都讚好。Apple直播時表現好淡定，但佢私下同鄭晴分享話，其實佢都好緊張。佢仲話，而家網上宣傳係大勢所趨，亦都係必須要做嘅事，咁樣可以畀大眾市民了解民建聯同佢哋青年組織嘅日常工作。Apple話，作為一個土生土長嘅香港年輕人，容易喺網絡接收大量資料，尤其係負面信息，不過佢話要化被動為主動，人哋鍾意發布負面信息，佢哋就鼓勵青年人分享開心快樂嘅信息，畀年輕人知所選擇咁話。
