圖：林鄭（中）同范太（右三）尋日出席咗乳癌基金「賽馬會九龍乳健服務中心」動土儀式\大公報記者麥潤田攝

　　「乳癌……係港女第三大癌症殺手！」咁大件事，唔係唔正視啩。政務司司長林鄭月娥、香港乳癌基金會名譽會長范徐麗泰兩位政壇一級阿太，尋日就出席咗乳癌基金「賽馬會九龍乳健服務中心」動土儀式。林太致辭時仲話，單係2014年乳癌就已經奪去咗600多名香港女性生命，自己身為現屆政府班子中唯一嘅女人，梗係要義不容辭嚟撐場啦！

　　除咗林鄭同范太，食物及衛生局局長高永文同香港賽馬會董事梁高美懿都有出席動土儀式。梁高美懿話，而家香港乳癌基金會得北角一間乳健中心，好多時女患者病左都仲要長途跋涉過海睇病。有見及此，政府就批出地皮，賽馬會就斥資撥款，等基金會可以喺牛池灣興建新嘅九龍服務中心，令更多市民得到乳健教育、檢查同患者支援服務。

　　呢個九龍乳健中心，預計會喺出年七月落成，跟住就正式投入服務㗎啦，中心仲會推行為期三年嘅「賽馬會乳妳同行計劃」，為超過三萬六千名女性服務，包括五千名低收入同經濟有困難者，提供免費乳房X光造影及檢查添。

　　其實鄭晴知道，政府一直都好重視防治乳癌工作，早喺2001年已經成立高層次嘅癌症事務統籌委員會，負責有關工作；林鄭尋日話，政府會繼續加強公眾教育、推廣健康生活模式同鼓勵各位女性定期檢查。姊妹們！唔想繼續畀殺手潛伏喺身邊，就記得去乳健中心Check嚇，關注健康啦。