圖：銀礦灣沙灘音樂節最近兩年就停辦咗，但今年終於回歸啦\大公報記者馮瀚林攝

　　鄭晴見到台灣墾丁音樂節就好羨慕，因為喺大自然盡情享受音樂，不過香港其實一直都有銀礦灣沙灘音樂節，佢由2006年開始嘅，不過最近兩年就停辦咗，但今年終於回歸啦！今屆更加由鄉議局全力贊助、梅窩鄉事委員會、離島青聯、離島婦聯共同主辦添。

　　音樂節將會喺今個月21至23號一連三日喺銀礦灣舉辦，分別會有四個表演區，包括Rock on the Road、互動音樂坊、派對坊同埋品味音樂坊，而表演時間係由中午十二點去到夜晚十點。最令鄭晴開心嘅係，一如以往，音樂節係免費活動，唔使入場費，樂迷就可以盡情狂歡。

　　尋日嘅記者會可謂星光熠熠，有Band壇最具代表嘅太極樂隊主音Joey Tang鄧健明、樂隊Supper Moment就擔任今屆大使，仲要搵到殿堂級嘅Danny Summer夏韶聲出席活動呢！仲有仲有，鄉議局主席─劉業強。發仔話，既然當日音樂節創辦人何明咁有志氣同勇氣，無理由因為資金問題而停辦，所以今年決定支持音樂節，又話年輕人要繼續追夢。Danny Summer就勉勵大家，當band壇喺全世界都沒落緊，各位band友依然玩緊，果然好奀皮，要多謝一眾贊助商。佢話，自己從未踏足銀礦灣，好開心今次有得參與，而呢個音樂節係好嘢，希望日後能夠繼續。銀礦灣沙灘音樂節闊別兩年，再加上陣容咁鼎盛，大家一定要支持本地音樂啊！