圖：早排鄭晴講過游蕙禎身上有紋身，咁啱佢前日離開論壇嗰時就畀鄭晴撞到正，仲親眼見到佢個紋身添

　　話說「尊貴」嘅「青年新政」立法會議員游蕙禎日前去咗個公開論壇，對住一眾大學生抱怨年輕人而家「×嘢（做愛）」都搵唔到房，要為佢哋爭取空間咁話！哇哇哇～莫講話其實唔係好多人有興趣知道游BB閒時喜愛「做」什麼，呢句說話喺立法會議員口中聽到，真係令鄭晴和好多人都當堂嚇一跳，唔知嘅以為去咗街市論壇喎。

　　游蕙禎「做愛論」一出惹起嘩然，好多網民圍攻，批評佢身為議員即使想講「青年人空間不足」嘅現象，其實有更多比「×嘢」更好聽嘅講法，何必搞到自己咁市井。

　　陳雲五十步笑百步

　　游BB尋日就喺Facebook轉移視線，話自己嘅言論無問題。游BB黨友梁頌恆都出Post護航，佢話：「一句『無地方×嘢』，只是道出真相，又有何罪？」游BB自己仲拉埋幾十萬年輕人嚟講，話社會市場已經飽和，各行各業難覓容身之所，負債之下，年輕人連做愛嘅場所都買少見少，「×嘢都要排隊」咁話！佢又聲稱要爭取空間，鄭晴諗咗諗……即係游BB當選後要實踐嘅政綱就係要為廣大「宅男」爭取「做愛做嘅事嘅空間」啊？真係「紅都面曬」！

　　另一邊廂，「泛民」、「熱普城」支持者就大肆抽水，陳雲暗串：「九西選民有眼光，選咗議員教×嘢。×嘢記得要排（隊），一樓一鳳守秩序」，不過，就有網民翻出陳雲去年提過「維記都畀自由行霸曬，年輕人想『爆房』都唔得，想唔廢都幾難」嘅言論，其實都係「五十步笑百步」啫。不過，鄭晴真係好擔心未來嘅議會質素，嗚啊。