立會選戰結束後，激進「本土派」之間罵戰不斷，鄭晴食花生都食到手軟。好似香港眾志秘書長黃之鋒早前宣布成為「候任立法會議員（香港島）羅冠聰的職員」，就畀敗選嘅「熱血公民」前頭目黃洋達老婆陳秀慧狠批「我哋納稅人嘅錢就係拎去出糧，畀一班未交過稅嘅廢柴細路」。另一敗選嘅黃毓民喺電台節目《毓民踩場》又酸溜溜咁話，「青年新政」嘅梁頌恆起碼要出夠五萬人工畀「本民前」嘅梁天琦，如果出得一萬咁少畀人知道就唔好睇，仲睇死唔好旨意游蕙禎、朱凱迪、劉小麗呢啲人喺議會入面衝。「教主」同班「熱狗」做乜咁勞氣？唔多唔少係眼見立會議員嘅肥水流入別人田，心不甘情不願咯，激進「本土派」入面咁多新仇舊恨，睇嚟新一屆立會都好戲連場喇。
