圖：Holden一講到太太就滔滔不絕，話對方畀佢好大支持\港人講地截圖
本身係律師嘅民建聯候任立法會議員周浩鼎（Holden），早前接受網站「港人講地」專訪。Holden笑住咁話，聽過有人形容佢係「師奶殺手」，亦有媒體統計過，話自己有唔少支持者都係家庭主婦。佢話好感謝市民嘅支持，「至於靚唔靚仔就見仁見智啦，哈哈。」不過講到最支持佢嘅「師奶」，就應該非Holden嘅太太莫屬喇。
訪問期間，Holden一講到太太就滔滔不絕，話對方畀佢好大嘅鼓勵、信心同支持。原來，周太曾經話過Holden如果繼續執業做律師，都可以闖出屬於自己嘅一片天地，擔心佢從政辛苦，需要承受多一重公眾壓力。Holden就話，自己係因為相信一啲政治理念而選擇從政，而佢亦都好多謝太太能夠體諒佢嘅工作。
Holden又話，自己嘅偶像係前美國總統里根，因為對方擅於溝通，能夠有效將自己嘅想法表達畀群眾，而佢任內亦都運用自己個溝通能力，化解咗好多問題同危機。自己作為議會「新丁」，都希望能夠學習到佢呢種優點，然後帶入議會。
