新一屆立法會將會響下月中「開鑼」，立法會大樓除咗會有一批新面孔嘅議員進駐，一啲新嘅系統設施亦將投入服務。其中一個亮點就係推出咗新嘅電子表決系統。內裏有咩東東？等鄭晴為大家先睹為快啦！

　　篤「芒」表決又方便查紀錄

　　過往嘅立法會會議，議員表決就要利用座位前面嘅電子表決系統投票，呢個系統由五年前立法會大樓落成一直用到 口依 家。立法會秘書處話，原有系統用咗咁耐，開始出現老化，亦有議員反映過撳掣投票會出現問題。

　　有見及此，秘書處就推出新嘅電子表決系統，議員日後利用座位前新安裝嘅平板電腦投票，屏幕除咗顯示信息，提示會議去到咩階段同埋議案內容外，仲可以畀議員翻查自己過往嘅表決結果。秘書處話，新系統較舊系統更易維修，運作更穩定。至於舊系統嘅收聽即時傳譯功能，就會繼續運作。

　　大樓增模擬主席台「打卡」用

　　要加入邊啲委員會，都係議員需要細心思考嘅問題。秘書處今次亦新推出一個網上系統，畀議員表明加入邊啲委員會或小組委員會，取代以往利用傳真通訊。議員只需登入系統，就可報名，仲可以睇到各個委員會有邊啲議員報咗名添，認真方便。

　　另外，每年都有好多公眾人士嚟立會大樓參觀，不過就冇得零距離接觸議事堂。秘書處搞搞新意思，響地下大堂展覽區旁邊，增設模擬主席台同埋議員座位，畀參觀者「打卡」，過下議員癮，甚至一嘗「佔領主席台」嘅滋味。相信立法會復會後，呢個景點一定深得市民喜愛。