郵政話你知 唔會話之你
「寫這高貴情書，用自言自語，作我的天書」。鄭晴突然咁好唱口，唔係因為買咗「唱K」神器，只因香港郵政尋日宣布將10月7日定為「郵遞傳情日」，以響應世界郵政日。傳情呢家嘢，單身嘅鄭晴睇到真係好葡萄，惟有整番封「給自己的情書」啦。
話說，香港郵政連續第13年舉辦呢樣活動，嗰日係紀念萬國郵政聯盟於1874年10月9日創立，目的係藉親筆撰寫書信，令人同人溝通更溫暖親切。
香港郵政邀請全港市民參與「郵遞傳情日」，市民可以當日郵寄一封私人信件畀本地收件人，表達關愛之情。寫好信後，可以喺全線郵政局（包括流動郵政局），設置嘅特別收集箱投寄信件，香港郵政會在10月12日或之前安排免費派送。其實呢，傳情都可傳畀親朋好友，大家到時「心動不如行動」啦。
