圖：唐唐千金唐嘉慧也陪着爸爸一起出席《唐翔千傳》首發式
好多兒子心目中都有個「英雄爸爸」，就連全國政協常委唐英年（唐唐）都唔例外。唐唐家族就為佢爸爸、香港「紡織大王」唐翔千出咗本《唐翔千傳》，尋日喺上海舉行首發式，有200人參加㗎。廿四孝囝囝唐唐仲飛埋去上海為新書打點一切。唐唐千金唐嘉慧也陪着爸爸一起出席首發式，孝順真係靠言傳身教呢。唐唐在儀式上還代表父親向上海唐君遠教育基金會捐款港幣500萬元。
唐英年致辭時話，爸爸素來低調行事，開頭無諗過要為自己立傳，但喺復旦大學前校長王生洪力勸下，終於首肯回憶往事。書裏記錄其奮發創業，為香港發展、回歸祖國貢獻等等事跡。唐唐唔單止孝順爸爸，仲對佢為社會嘅投入、做人嘅宗旨深感自豪，話爸爸對佢人生有好大啟發，仲話呢本唔單止係傳記咁簡單，仲係不可多得的家譜和家書，極具傳承意義。
咪住先，鄭晴之前好似有一本《唐翔千傳》啦喎，今次有咩唔同呀？唐唐就揭曉答案，原來本書最初只得繁體版，今次係專程為加印簡體字版，仲透露新版有佢親自為父親自傳寫嘅序言添！裏面記載住兒時同爸爸相處嘅點滴，仲有係佢落選特首後爸爸同佢講嘅一番說話，話「過去就讓它過去吧」。
