大公網9月26日訊 （記者 許嘉信）立法會換屆在即，即將卸任嘅民建聯立法會議員譚耀宗（譚sir）同葉國謙（阿謙），最近就忙於「執包袱」，騰出立法會辦公室俾候任議員用。兩位作為資深議員，各自都準備咗啲「心意」俾政壇後輩，譚sir就話會將自己嘅工具書送畀民建聯嘅區議員；阿謙嚟緊就會應立法會秘書處邀請，向候任議員分享自己嘅議會經歷，仲話打算到時傳授埋「剪布」秘技添！

　　立法會秘書處嚟緊將會為一眾候任議員舉辦為期兩至三日嘅迎新活動，其中一個節目，係邀請葉國謙同即將卸任嘅民主黨立法會議員劉慧卿（卿姐），向一班「議會新丁」講下議會事務同埋工作點滴。作為建制派「班長」嘅阿謙講笑話，自己都仲構思緊講咩好，不過見同場嘉賓係「泛民」嘅卿姐，咁就可以考慮嚇由自己講點樣「剪布」，卿姐就教班準議員點「拉布」，滿足曬唔同議員個需要喎。

　　阿謙雖然告別議會生涯，但嚟緊仲有機會返嚟立法會，事關佢係行政會議成員，遲嚇特首梁振英出席立法會答問大會嘅時候，佢就可以「更上一層樓」，同記者一齊響公眾席上面睇住會議情況喇。佢話，新一屆立法會可能都會好似今屆咁，點人數鐘聲不停響，希望啲「新丁」能夠坐定定開會。

　　至於同樣係元老級人馬嘅譚sir，今次真係「萬般帶不走」喇，事關佢從政咁多年，辦公室放滿議會文件同資料，好似檔案館咁，依家就煩緊點樣處理好。譚sir曾任香港特區籌委會預備工作委員會成員，佢話當年好多預委會嘅文件，自己到依家都仲保存住，希望能夠轉贈俾政府，又話自己早前已經將一啲書本同資料送咗俾部分學校圖書館添。