圖：華仔（右二）身體力行支持殘疾運動員

　　今屆里約殘奧啱啱落幕，一眾港隊殘奧代表以兩金兩銀兩銅佳績凱旋回歸，尋日仲搞咗個「里約2016殘疾人奧運會——並肩作戰！祝捷會暨嘉許禮」，連「天王」劉德華（華仔）都有去！華仔除咗向每位運動員逐一道賀之外，仲主動揸機同佢哋selfie自拍，恨得隔籬成班粉絲尖叫。不過鄭晴就覺得，同「天王」自拍嘅這些機會……留畀一班努力不懈、鬥志可嘉嘅港隊「殘奧英雄」，係值得有餘啦。

　　華仔作為香港殘疾人士奧委會暨傷殘人士體育協會副會長，其實支持殘疾運動員已經二十幾年，雖然今年因為拍戲去唔到巴西里約為殘奧運動員撐場，不過鄭晴仲好記得佢08年為北京殘奧作詞嘅勵志歌曲《Everyone Is NO.1》。點解一直以嚟都咁支持殘奧呢？華仔畀咗一個最真誠嘅答案：「那是應該的，因為他們真的是為我們而戰！」佢仲話，如果有真正去現場睇過佢哋比賽，一定會好似佢咁畀運動員嘅精神感動，每年都去支持。

　　講到今屆邊位運動員令佢最深刻？華仔話，係香港硬地滾球代表梁育榮「肥榮」！自從肥榮12年前拎咗金牌後，一直都只能喺團體賽攞獎，連之前勞倫斯體育獎都未有得到認同，覺得好可惜，今年肥榮終於再奪金牌，好替佢開心咁話。華仔大讚運動員們鬥志可嘉，又慶幸有好多新嘅運動員出現，呼籲大家繼續支持佢哋添！鄭晴聽完都好滾動啊！

　　喺自由泳項目擊敗眾多強手奪金嘅運動員鄧韋樂就話，好開心喺殘奧中奪獎，未來會做好每項訓練，希望喺本地或者外地賽中可以奪得更好成績。香港代表團團長伍澤連就感慨佳績得來不易，但亦為港隊帶來希望，佢話雖然里約殘奧剛結束，但港隊已經積極備戰，迎戰2018年雅加達亞殘運及2020年東京殘奧！