潮流興復古，除咗梳「飛機頭」、着番件古着，嚟緊仲可以遊歷25幢設有餐飲設施的歷史建築，皆因政府喺10月至11月期間，將會搞個「2016古蹟周遊樂」，免費入場之餘，有啲建築仲會有免費導賞團、提供免費小食或餐飲折扣，不過名額有限，手快有、手慢冇。
發展局文物保育專員辦事處發言人話，香港有唔少設有餐飲設施嘅歷史建築均保存得宜，活動提供一個難得機會，畀公眾近距離欣賞同了解其歷史同建築風格。
呢啲歷史建築就有：尖沙咀「1881」（前水警總部）、九龍木球會、元創方（前▉荷李活（道）／荷里活▉道已婚警察宿舍）、太平山餐廳（舊山頂餐廳）、香港半島酒店、大澳文物酒店（舊大澳警署）、YHA美荷樓青年旅舍（美荷樓）以及茶具文物館（舊三軍司令官邸）等。
所有有關嘅歷史建築都係免費入場，但名額就先到先得，額滿即止，參觀者仲可以喺呢啲歷史建築內收集設計獨特的歷史建築蓋印，以作留念。
鄭晴都好想同朋友仔一起去睇下古蹟，扮下「文青」咁啦。大家有興趣，可以去文物保育網站（www.heritage.gov.hk）了解下，或者打呢個電話2848 6230查詢。
