圖：劉鳴煒以《捉鬼敢死隊》造型登場，chok住介紹園內活動
劉鳴煒平日作風都好親民，但出生自名門世家嘅佢，就成日畀部分搞事網民無理狙擊。尋日鄭晴出席海洋公園萬聖節活動，見到身兼海園副主席嘅劉鳴煒，以經典電影《捉鬼敢死隊》造型登場，chok住介紹園內活動。依鄭晴所見，男神以「做實事」回應網民「離地」言論，呢鋪又贏一仗！
海洋公園一年一度盛事「哈囉喂全日祭」尋日舉行揭幕禮，海洋公園前主席盛智文同前行政總裁苗樂文都有嚟捧場，但今年扮鬼扮馬嘅重任就落喺劉鳴煒身上。揭幕禮上，劉鳴煒突然以一身《捉鬼敢死隊》嘅連身工作服造型登場，手上仲拎住支「雷射槍」，求其chok住擺幾個pose，全場即時掌聲四起！
劉鳴煒喺揭幕禮上逐一介紹園內八個哈囉喂景點，之後陪同兩位前輩去其中一個景點親身體驗。盛智文之後仲大讚今年嘅哈囉喂勁好玩，仲講笑指驚嚇程度係今屆立法會選舉嘅一百倍！唔知佢畀乜嘢邪魔妖怪嚇親呢？
