大公產品

首頁 > 文章 > 正文

阿Paul柯仔鬥靚仔 考起facebook大神

時間:2016-09-12 03:15:11來源:大公網

  圖:謝偉俊同柯創盛大玩selfie,仲叫網民評下邊個靚仔啲   謝偉俊 facebook圖片

  「魔鏡魔鏡,九龍東候任立法會議員全男班,邊個最靚仔?」候任九龍東立法會議員謝偉俊(Paul)同民建聯柯創盛(柯仔)就遇到呢個煩惱啦!事關兩位準同事,日前喺竹園邨中秋晚會上面碰頭,唔單止一見如故,仲大玩selfie(自拍)。阿Paul仲將張相放咗上facebook,叫網民點評下佢同柯仔邊個靚仔啲添!

  邊個最靚仔就各花入各眼啦!但見到兩位準議員笑到四萬咁口,鄭晴都感受到現場歡樂氣氛。之不過,睇落兩個人好似肥咗又滋潤咗少少喎,唔通選舉完即刻擦餐勁補充體力?

  唔使估啦,阿Paul喺hashtag(標籤)度已經解釋咗,話「#肥係角度問題」,仲學埋Tree根(鍾樹根)名句,「肯肯定」咁話唔係人(肥)嘅問題,只係唔識揸機自拍啫。計鄭晴話,一定係,除非唔係!不過講到自拍功力,睇嚟Paul同柯仔兩個大男人,得閒要搵下特首同財爺兩位教路啦!

最新要聞

最新要聞

最受歡迎