大公網8月17日訊（記者許嘉信）新一屆特首選舉明年3月舉行，大家都好關心「跑馬仔」最新情況。鄭晴聽講，特首梁振英（CY）尋日晏晝就去咗同一班「未來接班人」見面喎！唔好誤會，其實呢一班「接班人」，係30位參與由百仁基金舉辦嘅「百仁齊心杯---未來接班人訓練班」嘅中學生唧。CY同佢地打成一片，大玩各種遊戲，相當投入。

　　其中一個遊戲叫做「群策群力」，同學需要挑戰一組人響一張360度全景相入面，一個成員需要做出三種唔同嘅動作。有同學就提出以「Pokémon GO」為主題，扮演小精靈同埋補給站，而CY就扮訓練員響唔同位置捉精靈，非常有創意。有學生就讚CY好nice，一啲架子都冇。

　　事後，CY仲響自己嘅Facebook專業上載咗幾張相，分享下今日嘅活動情況。見到CY同同學企埋一齊玩自拍，相當受歡迎；其中一張相仲做咗少少「後期加工」，搞到CY同幾個學生個個變曬做「兔仔」，多咗對長耳仔同幾條鬚，又幾盞鬼喎。

　　CY話，自己能夠參與訓練，覺得好過癮，又以辯論環節嘅「Pokémon GO」 應否設禁區或遊戲區」為例，指政府如果要制定相關政策，需要諮詢更多持份者，亦要首先從安全角度出發，考慮自身同他人安全，更需要考慮專業同埋執行方面嘅難度，而不同持份者嘅意見同利益都非常重要。

　　其實依家嘅年輕人，唔少都好關心社會議題，有人更加話想加入政府，甚至做特首，為社會服務。唔知CY有冇響呢班「未來接班人」當中，聽到啲咩獨到見解呢？