之前香港有套電視劇叫《來生不做香港人》，筆者一聽個名就畀佢吸引咗。但唔做香港人又可以做咩人呢？筆者平日除咗煮下家常菜，就只係識投資賺錢，或者教授被動收入，要移民真係要諗清諗楚。

　　話說最近，筆者特別替希臘人擔憂，上個星期二，希臘政府通過咗一組由債權人提出嘅更嚴苛、更狠辣嘅銀行改革新方案。希臘前財長瓦魯法基斯向記者表示，一旦簽署咗呢個協議，咁希臘人將會變成歐洲央行、IMF同歐盟執委會嘅奴隸。即係話，希臘政府自主權會不斷流失，畀人「撳住嚟打」。

　　轉睇歐洲另一大國：德國。德意志銀行比美國司法部罰款140億美元天價嘅負面消息一出，加劇咗投資者對德銀償還能力嘅擔憂情緒，甚至擔憂成個歐洲銀行業都可能出現問題。德銀▉會唔／會晤▉會成為另一個雷曼兄弟？筆者唔知道，只可以建議讀者「來生不做歐洲人」。

　　去到美國，第一場總統候選人辯論圓滿結束，網上言論話係「爛蘋果」同「籮底橙」之爭。一個國家嘅領導人反映人民嘅需求同未來，睇嚟美國人對佢哋本土嘅未來都缺乏信心。加上，美國最近又揀咗韓國南部作為薩德反導彈系統嘅部署基地，未來外交風波不斷，地區政治唔穩定，旅行都要三思而後行。

　　講咗咁多，都係冇咩好選擇。其實從環球經濟角度嚟睇，做中國人最好。而家全球經濟發展焦點已經去咗中國，中國人去到邊，果度就促進外資流入；當全球為通脹水平擔憂，中國就穩步向前。配合十一國慶黃金周，筆者相信個人消費支出增加，將會帶動商品價格上升，建議投資者逢低買入黃金，目標1340美元上方。