圖：世界杯咁刺激，睇到魚子醬都唔記得擺入口

　　「登、登、登、」！世界杯分組賽踢得火熱，東道主俄羅斯與同組的烏拉圭已率先出線，摩洛哥就成為B組最快Out一隊，不知各位政界球迷眼光準不準？有網民調侃，民建聯近日似乎做了「明燈」，好似上周四名立法會議員如梁志祥、鄭泳舜、陳恒鑌及柯創盛熱捧的阿根廷，以及陳克勤、葛珮帆撐的德國隊，開場似乎都踢得不多好。

　　等等等等 等美斯「復活」

　　不過，民記的「燈」都不是盞盞「亮」！周浩鼎、劉國勳和張國鈞支持的英格蘭，與何俊賢撐的比利時就雙雙於首局勝出。張國鈞（Horace）仲好客觀對鄭晴話，自己晚晚都睇世界杯，按照現時各隊表現比利時可看高一線。至於柯創盛（柯仔）就同梁志祥（祥哥）一樣，最愛阿根廷，但兩人都話對隊長美斯表現失望，後防亦很有問題，希望這些問題都會改善。

　　會不會約朋友一齊看世界杯決賽？這三位球迷就梗係話會啦！柯仔笑言，暫時都是一支公在家裏睇，之後可能約埋民建聯的地區幹事一齊睇，地點可能是酒店，而大家同聲為入球歡呼喝彩，火熱好多。祥哥就推介去深圳走一轉，話現時港人上去方便，那邊好多茶餐廳都直播世界杯，食物又平又抵。

　　Horace又如何？佢老早在世界杯開鑼，已和十多名民建聯港島區新任幹事去朋友開的酒吧睇波。佢對鄭晴講，一邊睇一邊交流地區事務，氣氛相當好。不少民記兄弟知道後，話要學下Horace，希望決賽時，一大班民記黨友去Ann姐（蔣麗芸）家，邊睇波邊交流！