圖：譚志源與惠州市長麥教猛（中）及新風天域主席梁錦松（左）自拍留念
鄭晴收到線報，前高官齊齊北上聚首大灣區，到底搞緊乜？原來大家是去參加「首屆粵港澳大灣區衛生與健康合作大會」。今次大會是由粵港澳三地政府主辦，所以除了食衛局局長陳肇始出席開幕禮兼致辭外，不少前高官同公職王都罕有現身，好似前世衛總幹事陳馮富珍、前醫管局主席胡定旭，就連前政制及內地事務局局長譚志源（Raymond）亦孖住「新老細」、前財政司司長梁錦松出席。可能見到老朋友太興奮，譚志源就喺會上猛搵佢地集郵，同佢地一齊selfie，野生捕獲前食衛局局長高永文同副局長梁卓偉，同惠州市長麥教猛。
點解譚志源會出現喺今次衛生與健康合作大會？其實佢卸任官職之後，就過檔去幫阿松搞醫療生意，擔任新風天域醫療副主席，阿松今次亦獲邀就大灣區醫療養老及生命科技合作新模式發言。
譚志源仲話，而家做生意同以前做官好不同，因為在商言商，成本問題，不可以浪費時間，所以效率會高好多。他仲分享，他現在主力參與在內地建設療養院、居家養老等事，直接幫客戶解決需要，「有老人家的家人事後會寫信多謝我們的同事」，所以做事的滿足感都好大㗎！
