香港科學館與大英博物館合辦「永生傳說——透視古埃及文明」展覽，展出六具古埃及木乃伊和逾二百件文物，今年六月至今已吸引76萬人次入場，平均每日參觀人數逾8000人次，打破科學館專題展覽每日平均入場人次紀錄，更直逼2014年舉辦「巨龍傳奇」創下嘅77萬人次最高紀錄。展覽本月18日結束，未入場觀賞嘅市民要把握最後機會。
科學館館長陳淑文話，大英博物館對展場環境、展區設計、展品展示方式等要求都好嚴格，科學館團隊花咗一年時間籌備，首先面對嘅挑戰係尋找合適展櫃，事關木乃伊體積較大，棺木底部和上蓋需要一併展示，最後需要由外地訂製大型展櫃先解決問題。
展出嘅六具木乃伊和超過二百件文物，需要氣溫保持喺攝氏20度，先至可以妥善保存展品，所以呢次展覽難度都好大。
