除咗跑步之外，唔少人都鍾意打籃球、乒乓波、羽毛球、踢波等等，但係預訂場地都好困難，到底有咩方法可以令到多啲市民用到體育設施呢？民建聯尋日同民政事務局局長劉江華會面，民建聯立法會議員劉國勳會後就話，之前民記建議學校喺晚上或周六、周日開放體育設施畀公眾使用。佢話劉江華話，而家民政事務局同教育局商討，承諾會共同承擔額外嘅保安費支出。現時有100間學校參與相關試驗計劃，而呢個計劃已經推行緊，由一啲體育總會喺學校搞興趣班，咁公眾就可以喺課餘時間使用設施。
另外呢，國勳又話，為咗培養觀眾，民建聯建議應該要設立體育券及文化券，畀市民使用體育設施或睇下文化表演。佢引述劉江華，話而家體育最大問題就係欠缺場地，即使有體育券都無足夠場地。不過，劉江華對於文化券就有正面回應，仲幾有興趣添。將來西九文化區落成，文化券係可以考慮。民建聯會繼續跟進，並與民政事務局研究文化券適用嘅範圍。
