青年新政梁頌恆、游蕙禎嘅宣誓案終極敗訴，游蕙禎早前更喺facebook寫咗篇《陳情表》，話自己「驕奢躁進」、「以往之過永不可彌補」。佢哋尋日繼續喺電台節目死撐，估唔到事件過咗差唔多一年，佢哋思想都係咁幼稚，明明自己當日做錯事，就係都要唔認錯，不斷搵藉口為自己惡行開脫。

　　游蕙禎話，「驕奢躁進」指自己對人和事嘅態度，但絕對唔包括宣誓一事。嚇！被問到之前宣誓用「支那」侮辱中國人，佢係咪都覺得無問題？游蕙禎竟然話「首先係無侮辱過人同文化。」咁都講得出？睇嚟佢真係冇深切反省，完全冇是非之心。

　　主持問梁頌恆，今日嘅結果係咪自己攞嚟，佢就答話某程度上係，因為選擇從政就係自己攞嚟。佢當年同「青政」嘅人都講，「出得嚟行，預咗要還！」之後佢繼續口出狂言，話佢哋嘅錯誤在於過分高估司法制度對佢哋嘅保護，又話早知有咁嘅後果，連報名參選都唔會。

　　網民：怨不得人

　　至於佢哋兩個會唔會參加補選？游蕙禎就話參選唔合乎邏輯，梁頌恆就話睇唔到選舉有咩意義喎。

　　對於梁游咁樣狡辯，大批網民就真係好嬲，有網民話：「死撐唔知衰！」有網民就話：「自作自受，怨不得人。」所以話，群眾嘅眼睛真係雪亮嘅。佢哋家陣點樣維持生計？游蕙禎話，而家有人請，做啲唔使見樣嘅後台工作（唔見得光咩？），但維持生活就有啲難；梁頌恆就話未諗過將來會點喎！大家睇清楚，自己造成嘅惡果就要自己承擔返，根本與人無尤，唔好再用藉口開脫啦！