圖：「民族黨」的浸大論壇完結後，有大貨車運送「民族黨」的物資到城大，圖左為陳浩天搬運物資

　　鼓吹違法「港獨」嘅香港民族黨召集人陳浩天，除咗早前畀人爆佢同台灣學者孫治本密聯外，原來陳浩天嘅人脈殊不簡單，呢位「獨男」居然可以動用到喺內地設廠嘅香港玩具商架車、一架大貨車、一架電召車幫手運送物資，「民族黨」嘅運輸車隊認真大陣仗兼「疊水」。

　　七人車登記車主內地設廠

　　七一慶回歸二十周年嘅前一晚，「民族黨」喺浸會大學搞「港獨」論壇，先有架銀色日產ALPHARD G AX（大頭佛）七人豪華房車，運送「民族黨」物資去浸大，論壇開始咗，架「大頭佛」都唔走，泊喺浸大門口兩個鐘，認真夠「朋友」，未幾，有架電召車到達，由於論壇未完，兩架車一齊走。論壇完結，電召車再出現接載部分「民族黨」義工，一架大貨車又到場，一併車埋陳浩天同埋「民族黨」物資去城市大學，之後呢，就鳥獸散囉！

　　「民族黨」放一次「獨」，就大陣仗搵到三架車載人、載物，當中運送物資兼咁捱義氣呆等兩粒鐘嘅銀色七人豪華房車，來頭最「疊水」，登記車主係內地設玩具廠嘅Denny。Denny喺老竇開嘅「通X國際」任職董事，「通X」生產科學教育玩具、顯微鏡、望遠鏡加工，出口到日本、北美及歐洲市場。不過香港間辦事處已經劏咗八間房分租，朝早得一個阿婆收信。「通X」有另一間同Denny家族關係密切嘅公司接洽生意，工廈職員就話，一個月見到一次Denny揸架銀色日產七人車到間聯繫公司打點。

　　呢位Denny成日唔見影，喺惠陽間廠都係神龍見首不見尾，雖然係咁，鄭晴幾經努力終於搵到Denny，了解下佢架靚車點解幫「民族黨」搬物資？Denny電話回覆承認有部銀色日產車，車牌號碼同運載「民族黨」物資往浸大論壇嘅車牌一樣，但佢一時話「我諗你哋搞錯，我唔知咩事，唔清楚。」一時又話「可能畀朋友揸囉，我都唔記得咗喇，唔該你。」就截線！