想嘆名貴食材，不妨加15元到尊貴美食區搵食，今年有參展商推出限量五毫子一隻的涼拌大花膠及松露炒蛋；亦有參展商大玩Crossover，以黑松露醬配長洲大魚蛋；喜歡古靈精怪，又可試試全球首創的柑橘薰衣草芝士，食得過癮兼回足本。

　　尊貴美食區雖以昂貴食材為主，但不時有參展商提供低價試食，讓市民一嘗「貴價貨」滋味。採購公司味高美今年推出五毫子試食優惠，每日首20位客人，可以五毫子「嘆到」原隻、三十多頭的涼拌鱸魚花膠，以及黑松露炒蛋，花膠用雞湯浸過夜、攤凍，現場加入蒜、芝麻、蘋果醋，若遲了入場，亦可以40元買到一份。

　　魚蛋升呢 配黑松露夾唔夾？

　　長洲大魚蛋食得多，但搭配黑松露忌廉醬、韓風松露醬、黑松露醬加熱溶芝士一齊食，未必有人試過。意大利食品供應商義生洋行將在美食博覽，推出會場限定Crossover產品，結合意大利黑松露醬和港式地道小食大魚蛋，將魚蛋變為高級美食，兩粒約售20元至35元不等。

　　場內還有不少古靈精怪新研發食品，例如由The Dutch Cheese and More老闆從荷蘭帶回香港的柑橘薰衣草芝士，紫色外形雖然古怪，但製作過程不簡單，將牛奶以高溫加熱至70℃至80℃，較一般芝士甜，加上柑橘清香，是少有可以配搭香檳食用的芝士，現場亦有提供免費試食，不買都可以試夠本。