公務員事務局局長羅智光因為想聽嚇前線公務員嘅心聲，尋日去咗社會福利署同同事見面，特別去了解保護家庭及兒童課服務。呢個課專責處理虐待兒童、配偶或者同居情侶嘅個案，同埋喺管養子女方面有爭議，由法庭轉介嘅個案，所以有社署「重案組」之稱。
嘩！叫得做「重案組」，鄭晴諗起警匪電視劇內嘅重案組場面，但行入社署「重案組」，竟然係擺滿玩具，鄭晴真係非常好奇。社署署長葉文娟為羅智光介紹，呢啲玩具係畀社工同小朋友見面時用，當社工想單獨同家長傾嚇，都可以暫時安頓小朋友。羅智光尋日仲去埋社會保障辦事處，又同部門協商委員會、工會代表茶敘，了解佢哋嘅關注。佢大讚一班同事，有工作熱誠，有幹勁，勉勵大家繼續秉持「以人為本」信念，為有需要人士提供適時支援，好warm呀！
