圖：白頸鴉近年數量愈嚟愈少，香港目前只得362隻，佔全球總數20%
常言道「天下烏鴉一樣黑」，好多人以為烏鴉一定係黑鼆鼆，但凡事總有例外，仲成日出現喺你同我身邊！頸部披住白色羽毛嘅白頸鴉，以往常見於香港、南中國及越南北部地區，但近年數量愈嚟愈少，估計香港目前只得362隻，佔全球總數20%。唔想又多隻鳥類絕種？好好保護本地嘅白頸鴉棲息地喇！
觀鳥會倡保育級別升呢
鄭晴尋日聽香港觀鳥會研究經理余日東講，白頸鴉繁衍總體情況堪憂，短期內有滅絕威脅，所以已經向國際鳥盟申請，將保育級別由「近危」調升至「易危」。原來，國際鳥盟喺2004年，因應白頸鴉全球數量只有1.5萬至三萬隻，將佢列為「近危」級別，但白頸鴉數目喺過去十年急跌，估計全球剩低1847隻，主要住喺湖北、河南、安徽三省交界嘅大別山，而廣東地區除咗深圳，可以話係銷聲匿跡。
香港係白頸鴉嘅第二棲息地，米埔自然護理區最高紀錄到173隻，大埔汀角最高有117隻。第時行過路過，記得唔好滋擾佢哋喇！
