圖：唔少市民尋日都見到「火彩虹」／天文台提供

　　雨後見青天！鄭晴尋日心情大好，午間行經九龍城時，抬頭仰望晴空，嚇，天上面有條打橫嘅彩虹？呢條彩虹形態有別於平常嘅弧形，鄭晴覺得又靚又特別，即時影低同大家開心分享。原來唔少市民尋日上午十一點至中午十二點幾，都見到呢條打橫、長度較短、微彎向上的七色光段，為香港上空平添上獨特美意，喺網上「洗」曬版。

　　又係「通識時間」，鄭晴本着求真精神，打電話問下天文台。天文台科學主任龔穎恆解釋，嗰條其實唔係彩虹，只係光學現象「環地平弧」，又稱「火彩虹」。「環地平弧」嘅形成條件有啲唔同，先係由高空內嘅捲雲形成冰晶，再將陽光折射，而太陽照射嘅角度，必須超過58度，由於需要各種條件配合，所以十分罕見，天文台亦無明確嘅相關紀錄次數。如果你尋日有幸見到，代表你好好彩啦！

　　周末打風？ 言之尚早

　　七月係雨季，亦係颱風季節。南海一帶目前有一股低壓區逐漸形成，有歐美氣象部門預測，該區可能形成颱風，喺今個周末吹襲廣東沿岸，甚至影響香港。不過，香港天文台就話，依家仍然言之尚早，預測今明兩日部分時間有陽光，有幾陣驟雨，溫度介乎28至32℃，周六、日天氣轉壞，間中有驟雨及狂風雷暴，市民外出時，記得帶備雨具啦！

　　鄭晴