圖：莫嘉傑聯同一班後生仔女用投影方式慶回歸
後生仔表達愛國情懷，可以好有創意。人稱正義哥、舊年向高院入稟要求司法覆核青年新政梁頌恆、游蕙禎議員資格嘅大專生莫嘉傑，前晚聯同一班後生仔，喺灣仔利用投影方式，表達年輕一代「撐習主席，圓中國夢」嘅心願。呢個投影，左邊有習近平主席嘅卡通圖像，右邊係「中國夢」三個字。
同特區共同成長 貢獻國家
正義哥話，佢係1995年出世，參與今次慶回歸投影活動嘅朋友，有1997年出世，佢哋呢班九十後，可以話係同特區共同成長，見證回歸20周年香港繼續保持繁榮穩定，更加見證國家改革開放以來高速發展，佢深信習主席提出嘅目標，一定如期達到。
正義哥又話，現年二、三十歲嘅香港新一代，任重道遠，不單係香港未來30年建設嘅主力，更加會直接參與中華民族偉大復興。佢認為，呢一代人既要貢獻香港，更要貢獻國家。鄭晴聽後覺得相當感動，香港青年真係好愛國㗎！
