圖：田二少呢排頻頻Cosplay落區，教小朋友整「父親節禮物」
父親節，做仔女氹老竇開心，經已有一定難度。要諗計幫人，氹人哋嘅老竇更加難上加難！鄭晴講梗嘅係田北辰（田二少），佢連日嚟專登扮鬼扮馬，仲開金口教唱歌，無非都係想一班小朋友，可以氹到自己嘅阿爸笑到見牙唔見眼！
喺最近兩個星期嘅周六、日假期，田二少頻頻戴住一頂有骷髏骨頭圖案嘅海盜帽，Cosplay海盜周圍落區，同埋準備咗寫有「父親節快樂」嘅紙牌，畀小朋友揸住合照。佢話呀，小朋友用爸爸部手機影相，咁呢張合照save低咗，就成為「父親節禮物」，既免費又環保。
孫仔孫女氹得佢最開心
咁都不特止，田二少仲趁帶幼稚園學生參觀立法會時，將佢班孫仔孫女嘅必殺金曲，傳授比其他小朋友。「我愛我的公公，公公真偉大，公公教我努力，做個好乖乖……」，田二少話，家下氹得佢最開心嘅係班孫仔孫女，佢哋人仔細細，已經好識得孝順長輩。呢首歌最好之處勝於百搭，將「公公」改為「爸爸」、「爺爺」、「媽媽」、「婆婆」、「嫲嫲」，全家長輩聽完，實甜到入心啦。
