港區全國人大代表專題調研團近日到福建調研自貿區，除咗一眾熟悉嘅面孔之外，基本法委員會副主任梁愛詩（詩姐）作為新面孔都首次參加。究竟個團有幾吸引？詩姐話，以前返內地考察多數都係跟基本法委員會，今次加入呢個調研團係因為國家「一帶一路」建設進展好快，福建又係「海上絲綢之路」嘅起點，所以特登嚟睇下有乜嘢可以同香港合作嘅地方。
詩姐仲話，今次經已唔係第一次為「一帶一路」而考察，舊年基本法委員會率團去咗緬甸，發覺當地電力供應不足，而香港嘅電力成本遠低於當地，如果可以將香港嘅電力輸往緬甸，實在係一舉兩得。當然，呢個問題仲涉及兩國邦交，無咁容易實施，但如果個個都好似詩姐對「一帶一路」咁主動，商機自然源源不絕啦。
