圖：過往粵港澳專業廚藝大賽的「真．廚神」 網上圖片
佢高傲，但係宅心仁厚；佢低調，但係受萬人景仰；佢可以將神賜畀人類嘅火運用得出神入化，做出堪稱火之藝術嘅菜式！究竟佢係神嘅化身，定抑或魔鬼嘅使者？真正嘅廚神嚟啦！
工聯職訓就業委及飲食職工總會喺下月20日舉辦「第十二屆粵港澳專業廚藝大賽2017」，選出今年嘅廚神！唔知會唔會有瀨尿牛丸參賽呢？
除咗煮食技藝，工聯職訓就業委認為，其實香港有好多歷史悠久而且蜚聲國際嘅技能大賽，就好似同樣有超過十年歷史嘅中華兩岸世界潮流髮型化妝競技大賽，比拼下恤靚髮、化靚妝，不單止可以交流技術，仲可以透過比賽提升本地人才技能水平。
淨係廚藝大賽，過去12年已有615位精英參賽，其中超過100個仲經工會考取到國家職業資格證書，可以北上搵銀，大賽仲得到中國、台灣同澳門等官方機構積極支持。職訓就業委就覺得，政府應該大力支持各行各業舉辦大型技能比賽，例如係免費提供場地同埋積極協助技能比賽嘅宣傳推廣。不過如果真係搞，鄭晴就建議搵家燕媽媽出嚟做品評兼宣傳，實在太銷魂啦！
