「青年新政」游蕙禎及梁頌恆喪失議員資格後，已經淪為「過氣卒仔」，反對派對呢兩個人都唔再感興趣，仲將戰場轉移至新界東及九龍西嘅出缺議席上。鄭晴講過，學聯前常委張秀賢及新民主同盟范國威都有意參與新東補選，兩人尋日出席電台節目時更支持反對派內部搞初選，搵個最有力與建制派「一決高下」的人，張秀賢仲話參選後「棄選」方法都要考慮，揚言「最重要是『泛民』保住個位」。
講到咁曉以大義，但一被問到如「青政」派人出選，會唔會因政治倫理而讓位時，兩個人狐狸尾巴就即刻現形，張秀賢面有難色咁話要再商討；范國威更加明言即使「青政」派人，自己都會繼續選，話呢個叫以「大局為重」喎。計鄭晴話，傳統反對派梗係想本土派參加初選啦，到時就可以人多蝦人少，名正言順搵一個「泛民」政黨支持嘅人。
不過，呢個如意算盤網民似乎唔多受落，串爆范國威講一套做一套，話對方當初批評鄭家富出選新界東係「鎅票」，而家自己出嚟「鎅」「青政」票就係以大局為重，斥責佢係「新政棍同盟」，質疑佢以議席為重先真。網民仲紛紛譏笑范係「老千」，祝福佢「鄭家富在『大局』中等你」。
