候任特首林鄭月娥七月一日就會正式上任，近日已經密鑼緊鼓約見不同黨派議員，希望改善行政立法關係。自由黨黨魁鍾國斌（Felix）尋日就去咗民主黨前主席劉慧卿嘅網台節目，話其實立法會已經致力修補緊關係，又透露係建制派「班長」廖長江同公民黨郭榮鏗協調之下，立法會嘅建制同「泛民」議員已經傾好咗，喺五月初舉行午宴交流下，佢又話討論議題無前設，希望透過飯局聯絡感情，等同事們唔好再形同陌路。Felix仲話，社會已經給予修補撕裂機會和空間，希望林太上任後可先以民生議題合作為起步點，團結同凝聚社會。
至於新政府組班問題，Felix就話，自由黨有向新政府提交一份副局長同政治助理的推薦名單，但自己同黨主席張宇人就無意入局啦，仲慨嘆社會對官員嘅尊重程度低咗很多，搞到新政府好難邀請人出任問責班子，又話而家官員講錯一兩句都會令身邊人受影響，好多人才都因為家人反對而不肯做官。鄭晴就覺得，好似TSA同為捐肝女子推動緊急修例事件上，其實兩大陣營喺民生議題有合作空間，希望反對派唔好再事事反對，靜靜坐低傾實事，諗下點造福香港好啦。
