圖：gobee.bike的行政總裁Raphael Cohen希望同大家推廣單車共享嘅概念/大公報記者謝進亨攝

　　香港土地問題嚴重，想買架單車擺喺屋企，假日踩番轉都成問題，不過以後冇有怕喇！風行各地嘅智能共享單車終於登陸香港，今日起經過沙田、大埔等新界地區，就可以手機應用程式（App）租用，車租係每半小時五蚊，你畀得起亦畀得喜吧！想去邊就踩去邊之餘，仲可以隨時隨地還車，方便到呢！

　　本港第一個單車共享系統「gobee.bike」，今日起喺沙田、大埔同埋馬鞍山地區擺放400架智能單車，並逐步增加數目，估計七月暑假前可提供兩萬架，年底時服務範圍覆蓋至香港大部分地區，包括九龍、港島、愉景灣同柏麗灣等。

　　內置GPS Android用戶早享受

　　共享單車選用鮮綠色車身，配置咗盛物籃、夜行智能燈及防盜警鐘等裝備，仲內置咗GPS，有助追蹤單車位置。至於單車目前嘅租用方法只限Android電話用戶，用iPhone嘅朋友仲要等多陣。用戶只需安裝App，登記個人信用卡資料同聯絡電話，同時繳付390蚊按金，就可以透過App嘅互動地圖，尋找最近自己嘅單車。搵到單車咯，就要用手機掃描車身上嘅QR code，解鎖就踩得。交還時，用戶只需要喺尾轆位置幫單車上番鎖，系統就會即時停止計時，兼透過信用卡收取租車費。

　　車租每半小時五蚊抵唔抵？比新界地區租單車舖頭一般每小時25蚊、日租60蚊起平，但比起內地城市一小時一蚊嘅租金就算「天價」。鄭晴尋日就打探過單車舖口風，有負責人估計生意或多或少都會受影響，但就話共享單車概念未必啱香港人，皆因佢認為用家隨街泊低架車就還車走人，可能覺得阻街，仲話架單車雖然內置GPS，但管理公司好難知道啲單車嘅實際損耗情況。加之香港雨季嚟緊，擔心啲單車日曬雨淋、日久失修，架車壞咗冇人維修又冇人用，成條街隨時變成「單車墳墓」，影響市容喎！

　　之不過，gobee.bike策劃經理李淑澄就話，會密切監察單車嘅使用情況，仲話會同警方保持聯絡，收到有違泊投訴，會由警方通知再作處理。

　　鄭晴