圖：七小福首次亮相，並擁有了自己獨特又得意的名字 朱承炘工作室提供

　　首批香港出世嘅七隻導盲幼犬「七小福」，尋日正式拎咗「P牌」囉。點解導盲犬仲要學揸車？哈，原來「P牌」係指佢哋嘅新名字都以「P」字開頭。喺3月16日至22日，廣大市民已透過領展嘅「泊食易」APP投票，由香港導盲犬協會提供嘅20個名字入面，幫佢哋選出七個好得意嘅名。「七小福」由「大哥」到「七妹」，大名分別係：Popeye、Popcorn、Pasta、Pancake、Pepper、Pudding仲有Pizza，咦，大哥就同「大力水手」同名，其他六個名都係食物噃，唔通佢哋好為食？

　　寄養家庭訓練一年

　　而家「七小福」啱啱開始入住各自嘅寄養家庭，開始新嘅「狗」生旅程！大哥Popeye嘅寄養家庭毛小姐話，佢本身就好鍾意狗狗，屋企已有兩隻領養嘅狗仔，有十多年養狗經驗，聽講香港好缺乏寄養家庭，就決定領養導盲犬，出一分力。Popeye遺傳咗爸爸媽媽好好嘅基因，性格好乖，成日瞓覺，仲好愛撒嬌。唔同普通寵物狗可以隨便寵溺，食零食，Popeye有好多限制，比如唔可以隨便上沙發或床玩耍。

　　毛小姐話，好彩屋企有另一隻狗仔貼心咁陪住Popeye，毛小姐仲開心咁話：「佢哋依家已經好friend喇！」講起一年後Popoeye便要離開寄養家庭接受訓練，毛小姐好傷感話離開時一定會唔捨得。