曾聲稱已準備承擔一切法律責任嘅「佔中三丑」戴耀廷、陳健民及朱耀明被正式落案起訴普通法下嘅「公眾妨擾罪」後，由當日「勇」字當頭，驟變今日的「膽怯」。「三丑」於今日東區法院提堂前兩日，現身擅長打刑事及人權法嘅金葉大律師事務所。

　　戴耀廷本周二嘅六點幾離開港大，揸住架Mini Cooper往金鐘的統一中心泊車後，獨自一人行往隔籬的遠東金融中心，再搭上八樓，步入金葉大律師事務所Gilt Chambers。雖然步行路程唔超過十分鐘，戴耀廷不時頭耷耷睇手機短訊，似滿懷心事。戴耀廷日前被落案起訴時，曾信誓旦旦話會諮詢律師意見，確認控罪內容係咪屬實，聲稱基於「公民抗命」精神，佢哋三人會認罪喎。唔知係咪教法律的戴耀廷慣咗紙上談兵，到而家真係落場被控就搞到一頭煙。戴入咗金葉大律師事務所一個半鐘，先至同埋「佔中」另「兩丑」陳健民、朱耀明，以及立法會議員姚松炎同埋一名疑似律師樓女職員，一齊由金葉大律師事務所離開，一行五人行到統一中心就四散，戴耀廷則駕車返屋企。

　　金葉大律師事務所係行內知名律師行，有資深大律師麥高義坐鎮，麥高義近年打嘅大案有「曾健超案」、「南丫海難」及「許仕仁案」。有法律界人士透露麥高義收嘅律師費，一堂三十萬至五十萬元，單是「許仕仁案」代表郭炳聯嘅麥高義律師團隊，盛傳埋單三億。不過，麥高義今年二月還接咗法援署轉介案件，代表因「佔旺」被控藐視法庭罪嘅鄭錦滿同歐煜鈞。

　　「金葉」律師樓另一大狀夏博義係人權法專家，專打public law公法，夏博義於1995年與莫乃光創辦香港人權監察（HKHRM），不過香港人權監察其後被揭曾接受美國國家民主基金會資金。