劉業強希望借陪囝囝搵大學嘅過程培養父子情。大公報記者攝
大公網3月29日訊 身為鄉議局主席兼立法會議員嘅劉業強(Kenneth)日常公務繁忙，下月中又要帶團考察東江水，又要帶鄉議局去浙江考察，雖然日程排到爆曬，佢下星期都特登抽時間陪細囝飛去英國搵大學，真係廿四孝爸爸！
聽Kenneth講，佢囝囝好細過已經自己決定去英國讀書，又識得西班牙文同拉丁文，藝術、語言、數理樣樣皆精，囝囝出年就會升大學，所以佢下星期會陪囝囝一齊飛去英國睇下讀邊間好，目前囝囝想讀建築，連老師認為佢嘅囝囝藝術相當有天分，支持佢嚟緊讀建築。
老師仲話Kenneth個仔想法好耐以前已經好成熟，佢自己就估，應該係個仔細過同發叔傾偈多，所以做人相當有諗法，亦有責任感。Kenneth又話，其實佢囝囝已經有曬自己揀大學嘅想法，有時仲喺網上搵到資料反駁佢畀嘅意見。既然囝囝已經咁獨立，點解Kenneth仲要陪佢去英國搵大學？Kenneth話，其實咁耐以來一直都無咩時間同個囝相處，都想襯今次機會，培養一下返父子情。
