行政長官選舉候選人林鄭月娥擔任政務司司長期間,已經經常落區接觸市民。她自一月中正式宣布參選以來,持續走訪港九新界,同各階層市民面對面交流,真心聆聽意見,切實體察民情,做到真正的「We Connect」。趁住今日係特首選舉投票日,就等我哋同大家回顧一下,林太呢兩個幾月嚟喺各區留低嘅足跡啦!
1月20日 南區
林鄭月娥宣布參選行政長官選舉後,第一次落區就選擇到南區探訪,到區內茶餐廳飲奶茶,搭街渡同體驗新開通嘅南港島線,並細聽當區居民意見。其間,有市民同林太擁抱,高呼:「我支持你!我支持你!」林鄭月娥就承諾會同團隊繼續用心聆聽,努力改善大家嘅生活。
1月27日 西貢、沙田區
喺八十年代曾任西貢區助理政務專員嘅林鄭月娥,同西貢及沙田區嘅地區人士見面,聽取區內最新發展狀況。林太話,好鍾意直接同社區人士溝通,發揮地區智慧;又認為「官、商、民」三方可以加強合作,共同締造安居樂業嘅環境。
2月25日 觀塘區
林鄭月娥到訪觀塘同九龍灣,接觸聆聽當區市民嘅心聲,仲特意到訪2003年爆發「沙士」嘅九龍灣淘大花園,受到街坊熱烈歡迎。林太除咗讚揚淘大街坊當年同「沙士」搏鬥,體現香港精神之餘,仲話:「就算香港依家係有啲困難、有啲阻滯,但只要我哋團結一心,一定可以將香港發揮得更加好。」
3月9日 灣仔區
林鄭月娥到灣仔落區期間,參觀藍屋建築群。佢話,自己由出世到21歲,一直喺灣仔長大,對呢個舊區充滿感情。林太又話:「我希望未來嘅香港,儘管建築物比以前更現代化,仍然可以承傳着呢一份濃厚嘅人情味。」
3月11日 中西區
林鄭月娥到訪中上環,包括有「海味街」之稱嘅永樂街,向市民同商戶派發傳單,宣傳政綱,其間有市民主動上前要求合照。林太話,自己喺2007年任職發展局局長期間,領導渠務署處理永樂街水浸問題。有「海味街」嘅商戶大讚水浸情況「改善非常多」。
3月22日 九龍城、黃大仙區\
林鄭月娥由工聯會榮譽會長陳婉嫻陪同下,重遊啟德河同黃大仙。林太回顧自己擔任發展局局長時,發展啟德河嘅經歷,強調有效嘅施政要靠時常落區,貼近民心。佢又話,如果成功當選,會領導特區政府同事,多聽民間意見,為市民創造一個又一個好嘅地區項目。
3月23日 元朗區
林鄭月娥到天水圍同多個基層團體會面,商討區內墟市政策,並就早前失約兩度致歉,承諾如果當選特首,必定會定期落區,又話地區同民間智慧對政府制定政策十分重要。其間,林太逐一同市民握手,又同街市檔主同市民短暫交談,盡顯親民態度。