圖：范業成同粉絲「吹水」，好謙虛咁講自己係普通人／警隊網頁圖
20歲巴基斯坦裔警察范業成，年多前透過「寶石計劃」加入警隊，十天前經歷咗難忘嘅一日，成功用「響音」（鄉音）烏爾都語游說一名同鄉，從處於高空吊臂嘅危險位置返回安全地方。事後佢話，「只要可以幫到人，就幾開心」。佢咁叻，又咁靚仔，鄭晴都幾喜歡佢嘅。前日香港警察再發Facebook，搵到佢同粉絲「吹水」。
范業成用烏爾都語同埋廣東話介紹自己，又多謝大家支持。佢仲謙虛話自己同其他人一樣，都係普通人，又講「救人係我嘅職責，我都只係盡我本分。」
除咗范業成，香港警察又搵到啱啱攞到桌球世界冠軍嘅吳安儀同大家「吹水」，「四眼CUE后」趁呢個機會呼籲網民小心「裸聊騙案」，並告誡大家「同網友傾，唔使裸露身體嘅，所以要提防網上罪行，做個精明網民。」
