大公網3月16日訊（記者龔學鳴）講起老鼠，相信唔少人都會敬而遠之，民建聯立法會議員陳恒鑌（Ben）早前夜麻麻走去元朗鄉郊一個垃圾收集站視察，赫見裡面有好多老鼠出沒！連阿Ben都話畀「米奇兵團」嚇親。
阿Ben響自己嘅Facebook專頁上載咗一條短片。佢一開場就話，聽講有人話啲「米奇」（老鼠）比貓大，所以自己就親身實地視察下，仲叫網民「慎入」添。果然，阿Ben一入去垃圾收集站，已經見到啲老鼠三五成群，響垃圾堆中流竄，有幾隻仲要忽然奔走，搞到阿Ben都忍唔住大叫。
阿Ben視察完之後都大呼「好恐怖」，仲苦笑話：「我咩場面未見過，但今次真係第一次見，好誇張！」佢話，呢個垃圾收集站位於元朗鄉郊地方，估計至少有幾十隻老鼠聚集，但食環署一直都冇派人做過滅鼠同清潔工作，佢會去信食環署要求跟進事件。
